வணிகம் ஒரு பூங்கதவு எனில்,  அதை தாழ் திறக்கும் மந்திர சாவி சந்தையிடல் (Marketing) என சொல்லலாம். ஆடையில்லா மனிதன் அரை மனிதன் என்று தமிழில் ஒரு முதுமொழி உண்டு. வணிக மொழியில் சொன்னால், மார்க்கெட்டிங் தெரியாத வணிகன் அரை வணிகன் எனலாம். ஒரு மாணவன் படிப்பில் சிறந்து விளங்குகிறான். மருத்துவராக முடிவு செய்கிறான். பல்வேறு படிநிலைகள் தாண்டி பல ஆண்டுகளுக்கு பின் மருத்துவ பட்டம் பெறுகிறான். ஆனால், எல்லா மருத்துவர்களும் வணிக ரீதியாக வெற்றி பெறுவதில்லையே ஏன் ?  தன்னை, தன் மருத்துவத்தை, தன் மருத்துவமனையை சந்தையிட தெரிந்தவர்கள் வணிக ரீதியில் ஜெயிக்கிறார்கள். எனில்,  வெற்றி பெறாதவர்கள் திறமையற்றவர்களா? 

புரிந்து கொள்ள வேண்டியது இது தான். நீங்கள் நடத்தும் தொழிலில் உங்களுக்கு இருக்கும் திறமை மட்டும் உங்களை வணிக வெற்றியாளராக உயர்த்தாது. உங்கள் திறமையோடு கூட துல்லியமான மார்க்கெட்டிங் உத்தியும் கைகோர்க்கும் போது உங்கள் தொழில் வெற்றி அடைகிறது. நீங்கள் வெற்றியாளராக மாறுகிறீர்கள்.

சந்தையிடல் என்பது வணிகத்தின் ஒரு பகுதியல்ல. அது தான் வணிகம். மார்க் கியூபன் எனும் அமெரிக்க  தொழிலதிபரின்   வார்த்தையில் சொன்னால் “No sales, No Company”. `எந்த தொழிலுக்கும் ஆதாரமானது மார்க்கெட்டிங்கும், புதுமையான சிந்தனைகளும்’ என்கிறார்   ‘பீட்டர் ட்ரக்கர்’, எனும் நிர்வாக மேதை.